A tuhi Matupi khualeng lei ah ralhrang le AB an i kap lio tiah kan theih. Matupi um ralhrang camp dihlak AB nih an laaknak kong online ah june 29 ah an hun thanh.
Ralhrang pawl kha an hriamnam he an camp an rak chuah tak dih i, tuhi ralhrang pawl nih Matupi kiang um AB pawl he an i kap lio hna tiah khika kiangkap lei sin in kan theih .June 29 Edited, Matupi khuachung si loin Matupi khualeng lei deuh ah a si. Crd: William HC
Thawngpang dang: A Voi 2nak 1027 Operation An Kalpi Hnu In Ni 5 Chung Lawng Ah Tualchung Mi 20 Leng An Thi I Minung 30 Nih Hliam An. Shan ramkulh thlanglei, Kyaukme peng, Nawnghkio peng le Mogok peng chung hna ah TNLA nih 1027 Operation tiin a voi 2nak kahdohnak a kalpi ṭhan hnu ni 5 chung lawng ah tualchung mi 22 nunnak a liam i minung 30 nih hliam an tuar, tiah Ta’ang National Liberation Army(TNLA) thawng laaknak hrampi nih a chim.
“Hi ni 5 chung kahdohnak caan chung ah hin SAC ralhrang nih hriamngan kahdohnak a tuah mi ruang ah le Drone, raltuknak vanlawng in bomb a thlak mi ruang ah atu bantuk in tualchung mi nunnak liam mi le hliam tuar mi an um hi a si” tiah TNLA thawng laaknak hrampi nihcun a chim.
TNLA nih 1027 Operation tiin a voi 2nak kahdohnak an kalpi ni thawkka June 25 ah tualchung mi 2 nunnak a liam i mimung 5 nih hliam an tuar, June 26 ah minung 4 nunak a liam i minung 15 nih hliam an tuar, June 27 ah minung 3 nunnak a liam i minung 3 nih hliam an tuar, June 28 ah minung 11 nunnak a liam i minung 4 nih hliam an tuar, nizan June 29 ah minung 2 nunnak a liam i minung 3 nih hliam an tuar, an dihlak fonh ah tualchung mi 22 nunnak a liam i minung 30 nih hliam an tuar, mah pin ah biaknak lei inn telh in inn cheukhat zong an rawk” tiah a chim chap.
Ni 5 chung kahdohnak caan chung ahcun Ta’ang National Liberation Army(TNLA) nih SAC ralhrang sakhan 24nak tlawm lo an laak khawh pin ah Major le Captain pawl telh in 53 nih TNLA ralkap sin ah an hriamnam chiah in an i ap, tiah theih a si.Crd: lungmilipost
Leave a Reply