Chinram, Matupi peng in Lawngtlai District ah ral a zaam mi Chinmi pahnih cu nizaan June 12 ah tualchungmi pahnih nih aruang um loin an velh hna, tiah Matupi tualchung thawngzamhnak Matupi Times nih a ṭial.
Ralzaam pakhat nih, “Zinglei sml. 5:00 hrawng ah mehmua kawl ding in Pu Thang Lian le Pu Re Zung cu motorcycle in an kal i, a hnulei in tualchungmi pali nih motor in an dawi hna i an dirter hna. Tualchungmi pali cu motor in an ṭum i zeihmanh chimrel lo in an velh hna,” tiah a chim.
An velh hnanak ah Pu Thang Lian hi a haa pakhat a kiak i, an pahnih ning in an takpum ah velhnak hma an pu.
Velh an ton kong he pehtlai in nawlngeitu sin ah report an tuah i, a veltu tualchungmi pali nih minung kan i palh caah kan velh sual mi hna a si tiin an chim, tiah Matupi Times nih a ṭial. Velh a tong mi Pu Thang Lian hi fa pali a ngei mi a si i, Pu Re Zung zong hi fa panga a ngei mi a si. Crd: The Hakha Post
Leave a Reply