A Poi Tuk Ee Hakha Khuathar Biakinn 11 Ah An I Pum Kho Ti Lo Ngeih Chia Bak Si Ko Ee

SAC nih Nawl a Chuah mi Ruang ah Hakha Khuathar Biakinn 11 ah an i Pum Kho Ti Lo  SAC ralkap nih Hakha Khuathar sang chung Khrihfa biakinn pawl ah minung panga nak tam i pumh lo ding in nawl a chuah mi ruang ah Khuathar ah a um mi biakinn 11 ah an i pum kho ti lo, tiah tualchungmi nih an chim.

Zarhpi Ni zong ah minung panga cung i pumhkhawmh an honh lo caah mi cheukhat cu pumpak inn le sang dang Khrihfabu ah an i pum hna, tiah tualchungmi pakhat nih a chim.

“Atu tiang ah biakinn 11 ah an i pum kho ti lo. Anmahle inn ah pumhnak a tuah mi micheukhat an um bantuk in sang dang ah aa pum mi zong an um. Dawr zong pakhat hmanh an hong lo,” tiah a chim.

April 12 ah Khuathar lamton ah SAC vuanci pawl motor phu cu CDF-Hakha nih an rak kah caah SAC ralkap nih Khuathar sang chung ah a um mi dawr vialte khar dih ding in le biakinn ah minung panga nak tam i pumh lo ding in April 22 ah nawl a rak chuah.

SAC nih nawl a chuah mi hlihphuahpiak ding in Hakha khuanu khuapa hna le biaknak lei upa hna nih voi 2 tiang SAC ralkap an hal hna nain atu tiang ah cun SAC lei in bialehnak a um rih lo, tiah theih a si. crd: the hakha post