Myanmar Ram Nikhua Linh Tuk Ruang Ah April Thla Khat Chung Ah Minung 1,400 Leng Nunnak A Liam Myanmar ram hmun kip ah nikhua linh a zual chin lengmang ruang ah April thla chung ah Myanmar ram hmun kip um minung 1,473 hrawng an nunnak a liam cang, tiah tualchung mi le mi bawmchantu phu in ṭuanvo ngeitu nih an chim.
Khua a linh tuk ruang ah Mandalay ah cun ni khat ah minung 30 tluk an thi i April thla khat chung ah minung 900 hrawng an thi, vawleicung ah a linh biknak khuapi cazin ah aa tel ve mi Magway ramṭhen, Chauk khuapi ah cun ni khat ah minung 4 an thi i, thla khat ah minung 120 hrawng an thi. Cun, Yangon zong ah thla khat chung ah minung 441 an thi, tiah theih a si.
Chin ram thawng Chinram Paletwa peng ah AA nih ralkap luhter ding in mithar an kawl caah minung 40 leng cu India Mizoram ah an zaam hna, tiah theih a si.
Paletwa peng Miza khua ah April 19 ni ah an tuah mi tonnak ah kum 18 in kum 40 kar pa pawl cu AA ralkap ah tlak ding ti a si caah AA sin luh duh lo in minung 40 renglo cu April 30 ah khan Mizoram an phan.
“April 30 zan ah minung 40 an rak phan i tuzing ah minung 7 an phan chap, a rak zaam mi lakah nu 7 an i tel i an dih lak in kum 30 hrawng minung an si,” tiah a zaam mi hna bawmchantu pakhat nih a chim.
A zaam mi hna cu Lawngtlai district ah um in eidin, hnipuan le ṭhutdirnak kong ah an har ngai i bawmhchanh an herh kong a chimchap.
AA ralkap nih hin April thla chung ah Paletwa peng chung khua cheukhat cu tonbiaruahnak an ngeih hna i ralkap tlak ding ah an sawm hna, tiah theih a si. crd: the chin post
Leave a Reply