Khampat Ah SAC Nih Bomb A Thlak, Khuami Pahnih Nunnak Liam Nihin April 22, 2024, zinglei 2:00am hrawng ah SAC nih Khampat khua ah voihnih bomb an thlak i, tualchung mi nunnak liam an um pinah hliamtuar zong an um, tiah theih a si.
SAC nih hin Nan Sanpiah ah bomb a thlak hmasa i Saya Hei (Believer Church pastor) a fapa cu bomb ci nih a peh caah fak ngai in hliam a tuar, tiah theih a si.
Cun, Khampat No.1 ah a thlak ṭhan i khua mi pahnih nunnak a liam. Nunnak a liam mi lakah pakhat cu a ruak zong lak awk ṭha lo tiangin bomb nih a puah hnawh, tiah khua mi pakhat nih The Chin Post ah a chim.
Khampat hi mipi ralkap nih an lak hnu ah SAC nih lak ṭhan dingin an i zuam lengmang. Tutan bomb a thlaknak zong hi mipi ralkap an um ṭheu lai tiah an zumh caah a si, tiah an chim.
Caan zeimawzat chung dai tein an um hnu ah atu bantukin SAC nih bomb a thlak tikah khua mi hna cu thinphang le lungrethei ngai in an um, tiah Khampat lei in thawng kan theih. Crd: the chin post
Leave a Reply