Mipi Ralkap Pasaltha 5 Reng Lo Nih Ram Le Miphun Caah An Nun Nak An Pek RIP

Shan ramkulh, Ngyaungshwe peng kahdohnak ah mizapi ralkap lei in minung panga nih an nunnak an pek, tiah theih a si.

Ngyaungshwe peng, Ngyaunglaypyin khuate lei ah raal lam a sial mi SAC ralkap pawl cu April 13 ah khan Inlay-PDF, Free Burma Ranger (FBR) le Pekon-PDF nih an kah hna i SAC ralkap 30 leng an thi.

Inlay-PDF ṭuanvo ngeitu pakhat nih, “Lampi in kan bawh hna i kan kah hna. SAC ralhrang 30 leng an thi. Atu tiang an ruak zong an i char kho lo. Hliamhma a pu mi SAC ralhrang 20 leng zong Aungpan sizung ah an thlop hna,” tiah a chim.

Cu kahdohnak ah cun Inlay-PDF in ralkap pahnih, Pekon-PDF in ralkap pahnih le FBR nih ralkap pakhat an nunnak a liam, tiah theih a si.

Myanmar ram in Malaysia lei a zaamnak lampi ah a nunnak a liam mi Sibawi Khual Sian Tung ruak cu Chinram lei ah kirpi ti lo in Karen ram ah an vui, tiah theih a si.

CDM a tuah mi Sibawi Khual Sian Thang cu Malaysia lei ah zaam ding in aa thawh i, Karen ramchung hmun pakhat ah thaditnak in April 13 ah khan ruah lo piin a nunnak a liam.

Kum 32 lawng a si rih mi Sibawi Khual Sian Thang hi CDM a tuah mi a si i, COVID-19 zawtnak a tlun lio zong ah khan mizaw hna inn ah amah pumpak kal in thlopbulnak a tuahtu a si.

An Khrihfabu nih a tuah mi Medical Evangelism ti mi rianṭuannak zong ah a pum aa pe mi a si. Atulio kan ram sining ruang ah a ruak cu Chinram lei ah kirpi ti lo in April 15 ah khan Karen ram ah Khrihfa phungning te in an vui, tiah theih a si. crd: the hakha post