Kachin ramkulh, Danai peng, Nambyu khua tiva ah kum tling lo ralzaam nu ngakchia 5 cu nizan April 14 ni ah ti ah an tla i an zate in an nunnak a liam, tiah tualchung mi nih an chim.
“Nambyu tiva ah a paam mi ralzaam ngakchia cu Ja Htwe Pan(kum 13), Noenoe Mai(kum 11), Ja Sai Taung(kum 9), Ywai Taung(kum 12) le Ja Sai Mai(kum 7) an si i minung 4 ruak cu char a si cang nain ruak khat belte an hmu rih lo,” tiah Danai khua mi nih an chim.
“Nu ngakchia tete cu i kholh ding in tiva ah an kal i ti an dehnak ah ti a thuhnak lei ah an kal sual caah atu bantukin thil a cannak a si, ruak 4 cu an hmuh cang nain ruak khat belte an hmu kho rih lo,” tiah Danai khua mi pakhat nih cun an chim.
Nambyu khua ah aa dor mi ralzaam 200 hrawng cu kahdohnak ruang ah a liamcia 2020 thawk in Ngwepyau khua thar in aa dor mi an si, tiah an chim.
Mizoram, Siaha district ah khualtlawng a phur mi motor cu accident a tong i Thantlang peng, Vuangtu khua mi pakhat nunnak a liam pinah minung pakua hliam an tuar, tiah theih a si.
Siaha district in Chinram Vuangtu khua lei ah a kal ding minung 17 nih an i cit mi Pickup motor cu Lungbun le Tipi karlak ah April 13 zanlei suimilam 5:30 ah khan accident a tong i Vuangtu khua Pu Mang Cung cu a nunnak a liam, tiah theih a si.
“Motor accident nak a ruang hi a break a ṭhat lo ruang ah si. Kum 50 tluk a si mi Pu Mang Cung cu a lu aa khawng i a hmun ah a thi colh,” tiah motor accident ah aa tel ve mi pakhat nih Zalen ah a chim.
“Motor aa cit mi minung 17 chung ah minung 9 cu an i hliam i hliamtuar mi lakah kum tling lo ngakchia le kumkhat fai hrawng a si mi ngakchia zong an i tel. Hliamtuar mi pawl cu Siaha si-inn ah an kalpi hna hnu ah minung 3 cu Aizawl ah an lanhter hna,” tiah a chim chap.
Motor Khawndennak in nunnak a liam mi Pu Mang Cung hi hlaṭial le hlasak a thiam ngai mi a si i 2013 kum lio i rak tuah mi Zophei Idol ah Theme Song a rak ṭialtu zong a si, tiah a chim. A ruak cu a chuahnak Vuangtu khua ah April 14 ah an vui tiah theih a si. crd:the chin post
Leave a Reply