Kachin ramkulh, Momauk peng, China–Myanmar ramri, Lwegel khuapi um Khah-Lah-Yah 142 SAC ralkap sakhan chung ah tangka Kyats sing sangkhat an laak kong KIA thawng laaknak hrampi nih an thanh.
Nizan April 9 ah Khah-Lah-Yah 142 SAC ralkap sakhan chung um SAC ralkap le Non-CDM pawl cu sakhan chuahtak in China ram lei an zaam dih hnu ah KIA nih hmunram thianhfelnak an tuah i zaamtak mi tangka Kyats sing sangkhat an hmuh, tiah theih a si.
“Tangka hi Kyats sing sangkhat hrawng a si lai, Bank ah chiah mi tangka pawl laak in an chiah mi a si ṭheo lai, SAC ralkap thilri chiahnak innpi chung ah kan hmuh,” tiah KIA lei nih an chim.
Nizan April 9 ni ah Kachin ramkulh, Momauk peng, China-Myanmar ramri Lwegel khuapi chung ah a taang mi Khah-Lah-Yah 142 SAC ralkap le Non-CDM vialte cu China ram ah an zaam dih caah Lwegel khuapi cu SAC ralkap an um ti lonak khuapi a si tiah KIA nih phungning tein an thanh. Crd: the chin post
SAC nih hramhram in an tlaih mi mino pawl cu Myanmar ram hmun kip training sianginn ah a voi khatnak ralkap training an thawkpi cang hna kong SAC kuttang Media pawl nih nizan April 8 zan ah an thanh.
“Training a kai mi mino pawl cu anmah duhthimnak tein ralkap a tla mi an si,” tiah SAC kuttang Media pawl nih an thanh i training a kai mi zat belte fiang in an thanh lo.
SAC nih a liamcia 2010 November thla ah an rak ser mi Myanmar ram mino ralkap tlak dih ding ti mi phung cu a luancia February 10 ni ah an nunter ṭhan i March 9 in ralkap tlakter ding mi mino mincazin laak hram an thawk, mino cheukhat cu khuabawi pawl nih ralkap tla ding ah camcawhfung zuhter mi an si i, a cheu cu hramhram in an tlaih hna caah ramleng ah a zaam mi mino zong an tam.
“Atu lio ram dirhmun ah cun Myanmar ram mipi nih duh mi ram mino ralkap tlakter ding ti mi phung kalpi lo awk a ṭhat lo caah atu bantukin kan kalpinak a si,” tiah Zaw Min Tun nih a luancia February 10 ni ah a rak chim.
Ralkap tla ding mi pa hna cu kum 18-35 kar le nu hna cu kum 18-27 kar tiah SAC nih ri an khiah i siibawi, Engineer le a dangdang thiamnak a ngei mi cu pa kum 18-45 kar le nu kum 18-35 kar paoh luh an ngah ko, tiah SAC nih kum riakhiahnak an tuah. Ralkap tlak caan cu kum hnih tiah rikhiah a si ko nain thiamnak a ngei mi pawl cu kum 3 asilole kum 5 tiang a si lai. Ralkap tlak a duh lo mi paoh cu kum 5 tiang thong thlak an si lai, tiah SAC nih an thanh.
Leave a Reply