Thawngpang Tha Tak Tak Mi Pakhat Ralhrang Khua 4 Mipi Ralkap Sin Ah An Hriamnam An Chiah

Sagaing ramṭhen chung ah a um mi Pyosawhṭi khua pali nih PDF bu fonh sin ah hriam an chiah, tiah NUG runvennak zung nih thawng a chuah.

PDF sin ah hriam a chia mi Pyosawhṭi khua 4 cu Sagaing ramṭhen, Humalin peng ah a um mi Kyunkung khua, Tawngtwat khua, Inkyinmaw khua le Manawthar khua hna hi an si.

A cunglei khuate pali in SAC ralkap hnuzul Pyosawhṭi milu 120 hrawng nih PDF sin ah hriam an chiah i, an i tlaih mi meithal phuntling zun 130 zong PDF kut ah an ap.

A cunglei khua 4 chung ah hin Tawngtwat khua hi Pyosawhṭi an rak ṭhawn ngainak khua a si i, atu bantuk in hriam an chiah caah teinak nganpi pakhat a si, tiah PDF ṭuanvo ngeitu upa pakhat nih a chim.

Mon ramkulh hriamtlai phu thum a si mi Mon State Federal Council(MSFC), Mon State Revolutionary Force(MSRF) le Mon State Defence Force(MSDF) cu SAC ralkap nawlngeihnak a hram bongh ding ah kahdohnak ah ṭangṭi ding in hnatlaknak an ngeih kong nizan April 7 ni ah an thanh.

“Mon ramkulh hriamtlai phu pawl he i fonh in kahdohnak ah ṭanṭi a herh caah atu bantukin hnatlaknak kan ngeihnak a si,” tiah Mon Ramkulh Federal Council(MSFC) ukhruaitu Committee Chairman Naing Mon Sai nih a chim.

“Ramkhel lei zong ah i fonh kan hau, ramkulh dang he tahchunh ahcun dirhmun ṭha cu kan phan rih lo, aa khat lo mi ramkhel thazaang hmunkhat ah kan i fonh kho rih lo, kan zapi in ningcang a ngei mi khuakhan thiamnak kan ngeih dih a herh,” tiah Naing Mon Sai nih cun a chim.

Mon ramkulh hriamtlai phu thum nih hnatlaknak an ngeih bantukin MSDF in ṭuanvo ngei cheukhat cu MSFC ah an i fonh i ramkhel lei rianṭuanṭinak ngei in MSDF le MSRF cu kahdohnak ah ṭangṭi ding in hnatlaknak an ngei.

Raltuknak kong he pehtlai in MSDF le MSRF cu ralkap training le hriamnam serchuah ding rian ṭuanṭi in le kahdohnak ah ṭangṭi ding in hnatlaknak an ngei, tiah theih a si.