Chinland Council ralkap nih thla 8 chung ah Colonel le ralbawi dang 14 telh in SAC ralkap 100 leng

Chinland Council ralkap nih thla 8 chung ah Colonel le ralbawi dang 14 telh in SAC ralkap 100 leng an tlaih hna, tiah theih a si.

A luancia January–August tiang thla 8 chung, Chinram chung ah khuapi laak kahdohnak le a dangdang kahdohnak kalpi mi ah SAC ralkap le palik 110 tlaih an si kong, CNF/CNA chimnak nawlngei Salai Htet Ni nih a chim.

“Thla 8 chung kahdohnak i tlaih mi lak ah Colonel pakhat le ralbawi dang 14 an i tel, SAC ralkap le palik tlaih mi 100 leng chung ah zatuak 70 cu hriamnam he tlaih mi an si i Geneva Conventions phung he aa tlak ning tein zohkhenh an si,” tiah CNF/CNA chimnak nawlngeitu nih cun a chim.

Rezua khuapi le Matupi kahdohnak ah SAC ralkap le palik tlaih mi an tam bik i, Rezua khuapi ah minung 39 le Matupi khuapi ah minung 60 leng an tlaih hna pin ah SAC ca ah rian a ṭuan mi Dalan cheukhat zong CC ralkap nih an tlaih hna, tiah theih a si.

Nihin October 1 ah SAC nih Myanmar rampi huap in innchungkhar cazin laaknak a thawk i Hakha khua le Falam khua sang cheukhat zong ah innchungkhar mincazin laaknak an tuah, tiah theih thawng kan theih.

Zinglei sml. 10:00 hrawng ah Hakha khua Dawrhlun sang le Paleklen ah SAC nih mincazin laaknak an tuah i, kahdohnak zong a chuak, tiah tualchungmi nih an chim.

“Hakha ah SAC nih innchungkhar cazin an laak ruang ah a si men lai, Paleklen lei in meithal kah thawngpang a thang len,” tiah tualchungmi pakhat nih a chim.

Asinain, Hakha ah meithal kahnak thawng a thanmi hi SAC nih innchungkhar mincazin a laak ruang ah maw a si timi fiang in theih a si lo.

Falam khuachung sang cheukhat zong ah SAC ralkap le palek nih meithal he an zulh hna i innchungkhar mincazin laaknak an tuah ve.

SAC ralkap nih tuah a timhmi thimnak ca ah innchungkhar mincazin laak a bawmtu Non-CDM pawl cu anmah SAC ralkap bantuk in ruah nan si lai i, kan in kah cang hna lai, tiah CDF-Hakha nih September 23 ah ralrin peknak ca an rak chuah.

Chinram, Paletwa peng ah tualchung mi pathum cu Rakhine ramkulh, Kyauktaw i thil an kuat lio ah an pathum te in tuksapur ngaiin thah an ton kong le zohchia ngaiin chungkhar lei nih an ruak an hmuh hna kong, Paletwa peng tualchung mi pakhat nih a chim.

Paletwa peng tualchung mi pakhat nih cun, “September 8 ni ah khan India lei ah an laak mi thilri cu Kyauktaw lei ah fapa hnih le an tupa tiin minung pathum nih va kuat ding in an kal lio ah thah an rak tong. An kal lei ah maw thah an ton an kir lei ti cu a fiang lo. Chungkhar lei nih Paletwa peng chung i an ruak an hmuh tik hna ah cun takpum a dang, lu a dang tiin minung pahnih cu an va hmuh hna,” tiah Chin World Media ah a chim.

“Thah a tong mi pathum i an ruak cu Paletwa peng thlanglei Tanseik khua ah ruak hnih, Mundaunt khua ah ruak khat tiin an hmuh hna i Tanseik khua i ruak hnih an hmuh mi cu an lu a dang, an takpum a dang in a um i an pum cung ah nam sah hma lawngte in an khat,” tiah tualchung mi pakhat nih cun a chim.

Hi kong he pehtlai in Paletwa peng uktu ULA/AA nih cathanh an chuah mi tibantuk hmuh awk a um rih lo i tualchung mi pathum a thattu hi misual maw an si, Rakhine ralkap AA dah an si ti cu fiang in theih a si rih lo.

Sagaing ramṭhen, Budalin peng ah rallam a sial mi SAC ralkap 100 hrawng cu tualchung hriamtlai ṭangṭi phu nih lampi ah an kah hna i minung 50 leng an thih pin ah a dang minung 40 hrawng an tlaih hna kong, 96 Solider PDF in ṭuanvo ngei Ko Nyan nih a chim.

Nihin September 30, chunlai suimilam 12:00 hrawng ah Budalin peng, Kutaw SAC palik sakhan ah a phan i Budalin khuapi lei ah rallam sial in a kal mi SAC ralkap 120 hrawng cu PDF ṭangṭi phu nih lampi ah erhkhumh in an kah hna i minung 50 leng an thi, minung 40 hrawng an tlaih hna. Cu kahdohnak ah cun PDF ṭangṭi phu nih SAC ralkap hriamnam tam ngai an laak, tiah theih a si.

Budalin peng kaphnih kar kahdohnak cu suimilam 4 hrawng a rau i zanlei suimilam 3:00 hrawng ah SAC nih raltuknak vanlawng Jet Fighter in voi 5 hrawng bomb an thlak pin ah seh meithal in kahdohnak an tuah. Kahdohnak a chuahnak ah cun SAC nih Mi17 an thlah i cuka hmunram hrawng cu a hel, tiah theih a si.

Cu kahdohnak ah cun 96 Soliders PDF, Budalin peng PDF, NUG Defence Ministry ralkap pawl le Pah-Kah-Phah phu an ṭangṭi i tualchung hriamtlai phu in thi le hliamtuar um lo tein teinak an hmuh, tiah theih a si.