Lailenpi Cu Security Kong Ah AA Nih An Chuahtak Rih Lai Lo: MDF. Chin Brotherhood tang ummi hriamtlai phu tete hi an dirhmun ruah ah zaangfak ngaingai an si. Anmah nawlngeitu si le an duh. Anmah lawng in zei ral hmanh an tei kho fawn lo.
An vansan in AA an i rawih i AA nih SAC ralhrang a tukpiak hna a tei hnu zongah anmah lawng um an ngamh hoi lo. A phunphun phanmi an ngei peng rua. SAC ralhrang tthio cang hnu zongah mah lawng um a ning a ttimi ralkap phu hi an mak ngai.
Tutan zongah MDF nih cu anmah lawng um an ngamh hoi lo a tanglei bangin cathanh an chuah. MDF nih AA le CB nih July 16,2024 ah Lailenpi an control nak kong thawng an thanh. Lailenpi ukhruainak ah AA an itel lai lo. Mipi ukhruainak phunghram kan ser cuahmah. AA cu security kongah Mara ram ah an um rih lai tiah an thanh chih.
Thawngpang dang: Hakha-Thantlang Kar SAC Ralkap Sakhaan 3 CNA le CDFs nih an Laak Cang. Hakha le Thantlang karlak ah a um mi SAC ralkap hmunkhuarnak pawl cu July 21 zaan thawk in Chinland Council chungtel CNA le CDFs ralkap pawl nih doh hram an thawk i sakhaan pathum an laak khawh cang, tiah CNF/CNA chimnak nawlngei Salai Htet nih a fehter.
Salai Htet Ni nih, “Hakha le Thantlang karlak ah a ummi SAC ralkap sakhaan pawl thianhhlimhnak kan tuah hna. Sakhaan pathum kan laak cang. Atu hi a dang sakhaan pakhat kan doh lio a si,” tiah media ah a chim.
Lungkhar SAC ralkap hmunkharnak le Auto tlang cu “Tilim Operation 4” min in CNA le CDFs ralkap pawl nih an doh i, nihin zinglei ah khan Lungkhar ah a ummi sakhan pawl an laak khawh cang i Auto tlang sakhaan a taang.
Bawmhnak pek ding in Hakha khua in SAC ralkap mawtaw pahnih zong nihin zinglei ah khan an i thawh, tiah tualchungmi nih an chim.
Lungkhar ah a ummi CNA le CDFs ralkap hmunkharnak pawl cu 2023 May thla thih lei ah khan SAC ralkap nih faak piin an rak doh i, June thla zarh khatnak ah an rak laak khawh. SAC ralkap nih Lungkhar an laaknak kum khat fai a rauh hnu ah CNA le CDFs nih Lungkhar an laak khawh ṭhan hi a si. July 22 || The Hakha Post
Leave a Reply