CDF-Thantlang Council Tang Um Palik Nih People’s Police Training Tlamtling Tein An Lim. Chinram, Thantlang peng hrambunh, Chinland Defense Force – Thantlang Council tang i a um mi palik pawl nih a voi 4nak People’s Police Training cu tlamtling tein an lim kong, CDF-Thantlang nih nihin June 20 ah an thanh.
Atu tan a voi 4nak People’s Police Training cu Department of Home Affairs ṭhithruainak in an tuah i CDF-Thantlang hmunram chung ah a um mi palik hna nih palik kong he pehtlai in rianṭuan an thiam nakhnga a lam kip in cawnnak an ngeihpi hna. Cun, zatlang ukhruainak kong zong ah mizapi he pehtlaihnak ṭha an ngeih i rianṭuan an thiam khawh nakhnga palik zulhphung an cawnpiak hna, tiah theih a si.
“Hi training ah hin training a kai mi palik hna nih hlawknak tampi an hmuh kan zumh, rianṭuan ningcang kong zong an i fiang ngai lai. Training petu zong hi CDM tuah mi palik an si i training ca ah ciammam tein sawm mi an si. Training hi zarh hnih tluk tuah a si i July 17 ni ah khan tlamtling tein an i lim. Training kai mi hi cu minung 50 hrawng an si,” tiah CDF-Thantlang palik bawi pakhat nih The Chin Post ah a chim.
CDF-Thantlang Council tang ah a um mi palik pawl cu anmahle hmunram cio ah mipi ca ah biatak tein rian a ṭuan mi an si i zatlang ukhruainak kong zong ah a lam kip in a cawlcang mi an si. The Chin Post || 20 July 2024
Thawngpang dang: Mizoram ramkulh, Lawngtlai in hmun dang ah eidin tirawl phurh a ngah ṭhan cang, tiah CYLA nih nizan July 18 ah an thanh hnu in Mizoram—Chinram, Paletwa chawlehnak lampi zong hman a ngah ṭhan cang, tiah theih a si.
CYLA nih nizan July 18 zan thawk in Lawngtlai in hmun dang ah eidin tirawl phurh an onh cang nain Petrol le Diesel phurh tu cu an kham ṭhiam. Thil phurh kong ah hin YLA Branch kip nih mahle sang chung in a chuak ding mi motor paoh an zohfelpi hna lai i YLA Branch kip nih pehzulh in an sang cio chekhlatnak an tuah lai, tiah theih a si.
“Myanmar ram lei i thil phurh duh ahcun zinglei suimilam 5:00-8:00 kar le zan suimilam 9:00-11:00 kar ah phurh khawh a si i chun hrimhrim ah Myanmar ram lei ah thil phurh a ngah lo. Caan rikhiah mi chung i thil a phur lo mi dawr ngei le kudawng ngei pawl cu YLA nih kharpiak an si lai. Cu pin ah thilri ṭhumthlak tik ah sang mi hnacheh lo ding le motor nunter in hnahnawhnak pek hrimhrim lo ding,” tiah Lawngtlai-III YLA nih nihin July 19 ah an thanh.
Chinram chung ah Rakhine ralkap AA pawl duh paoh in an cawlcangh i kahdohnak an tuah hnu in Mizoram in Chinram, Paletwa–Rakhine ramkulh lei pehtlaihnak chawlehnak lampi cu CYLA nih a luancia June 24 ni thawk in an rak khar.
Leave a Reply