Hakha–Thantlang Kar I An Rak Sungh Mi Sakhan Pawl SAC Ralkap Nih An Nam Ṭhan Chinram, Hakha–Thantlang kar ah Chinland Council ralkap nih an rak laak mi SAC ralkap ca ah a biapi sakhan pawl laak ṭhan ding ah SAC ralkap nih an nam i kaphnih kar kahdohnak a fak, tiah theih a si.
Hakha khuapi he meng 5 hrawng aa hlat mi Timit ah umhmun khuar in a um mi SAC ralkap pawl sin ah nizan October 14 ah motor 7 in ralkap thazaang an chap hnu ah CC ralkap nih an uk mi C3 hmunram ah nihin October 14 zinglei in kaphnih kar kahdohnak a fak colh, tiah theih a si.
Hakha–Thantlang kar i a um mi SAC ralkap umhmun khuarnak Auto tlang, Lungkhar tlang, Keivanzuang le C3 sakhan cu CC ralkap nih a luancia July thla chung ah an rak laak i kahdohnak a um ti lo. Atu ah cun SAC nih an rak sungh mi Hakha–Thantlang kar cu laak ṭhan i tim i kahdohnak an kalpi i hriamngan le vanlawng in kahdohnak an tuah, tiah theih a si.
Hakha–Thantlang kar kahdohnak an kalpi hlan October zarh khatnak ah SAC nih Helicopter in Hakha khuapi chung ah hriamnam tiah zumh mi a thlak i ralkap thazaang an chap. Nizan October 13 zong ah SAC nih Timit le Thantlang lei ah Y-12 vanlawng in voi tam ngai bomb an thlak i nihin zong ah bomb tam ngai an thlak chap, tiah theih a si.
“Thantlang cu Hakha ca ah a biapi tuk mi ralvennak pakhat a si. Falam le Thantlang cu Hakha Byuha sakhanpi ca ah a biapi tuk mi an si. Hakha khuapi kan laak ah cun Chinram ah teinak kan hmuh khawh caah atu bantukin Thantlang an nam pengnak a si,” tiah CC in ṭuanvo ngei pakhat nih a chim. Crd: TCP
Thantlang Naih Deuh Khua Hna Nih Ralrin Dingmi Tiah Kan Ruahmi Ralhrang nih Thantlang lak than an duh caah tuhi operation an tuah cuahmah cang. Vanlawng , miakpi le kee he tiah an luhhnawh thok cang.
A tu kan zumh ningah nitin/zantin ti awk in vanlawng a rak zuang peng lai tiah kan zumh ning. Mah hi Share tuah khawh si mu.
Vanlawng nitin/zantin ti awk in a rak zuang kho tiah kan zumhnak cu, ralhrang pawl hi Timit ah an i pumh khawmhnak hmun si i, kee in Lungkhar tlang le auto tlang lei nam an duh caah an kalnak ding kha vanlawng nih lam a sial peng ko lai tikha kan zumh ning asi.
October ni 14 zing sml 3 AM ah Thantlang peng Congthia khua luh lai ah Jet nih bom a thlaknak kong kan rak thanh cang.
Cucaah abik in Thantlang naih deuh um khua hna nih ralring tein umthut thiam a biapi ngaingai lai tiah siaherhnak he kan hun thanh.
Note, mah kan tialmi ruangah lautuk in um ding tinak a si lai lo; ralring tein um hi a sual lo tikha kan hun thanh duhmi a si ko. w
Leave a Reply