Chinland Council Ralkap nih Thantlang CB Bank An Laak Cang Chinram, Thantlang khuapi i SAC ralkap umhmun khuarnak CB Bank cu Chinland Council ralkap nih nihin October 7, chunhnu suimilam 2:00 hrawng ah an laak khawh cang, tiah theih a si.
Hi kong he pehtlai in Chinland Defense Force – Thantlang, GS Salai Khamh Pek Lian nih cun, “Kan ralkap nih CB Bank an laak ti cu a dik mi a si i fehter khawh a si ko. Kahdohnak hi chunhhnu suimilam 1:00 in thawk a si i zanlei suimilam 2:00 hrawng ah an laak khawh. Ralhrang a thi mi ruak zong hmuh an si i kan ralkap nih an laak mi hriamnam zeimawzat zong a um,” tiah The Chin Post ah a chim.
A luancia September 17 ni ah khan Thantlang khuapi chung SAC ralkap 30 hrawng umhmun khuarnak Lai Villa innpi cu Chinland Council ralkap nih Drone in bomb an thlak i a chung um mi SAC ralkap 7 hrawng an thi, hliamhma he a zaam mi zong an tam i an zaamtak mi hriamnam zeimawzat cu CC ralkap nih an rak laak. October 4 ni zong ah khan Thantlang khuachung ah kaphnih kar kahdohnak a fak i SAC ralkap nih raltuknak vanlawng pahnih le Y-12 vanlawng in bomb voi 70 hrawng a thlak, tiah theih a si.
Thantlang khuapi chung ah hin SAC ralkap umhmun khuarnak palik sakhan, penguk zung le NLD zung lawng a taang cang i SAC ralkap zeimawzat nih an hngah i Thantlang khuapi laak ṭhan nakding ca ah Tilim Operation 4 min in CC ralkap nih cu sakhan pathum cu pehzulh in an kah cuahmah, tiah theih a si. crd: the chin post
Leave a Reply