CNF/CNA Le ZRO/ZRA Tonbiaruahnak An Ngei Lai. Zo Re-Unification Organisation (ZORO) tawlrelpinak in CNF/CNA le ZRO/ZRA hruaitu pawl cu thaizing July 27 ah tonbiaruahnak ngeih an i tim i kaphnih kar i hmuhthiam lonak kong ah remdaihnak ser ding in biaruahnak ngeih an i tim, tiah theih a si.
Chin ralkap CNA ṭangṭi phu le ZRA cu kaphnih kar i hmuhthiam lonak ruang ah an i kap tawn i kaphnih in thi le hliam zong an um tawn. A luancia May 1 ni zong ah khan Tedim peng, Laitui khua pawng ah an rak i kap i CNA lei in ralkap pakhat nunnak a liam. Hi kong ah hin ZORO nih cun mah le mah i hmuhthiam lonak hi donghter in remdaihnak kong ceihmaipi ding in a tawlrelpi hna, tiah theih a si.
ZORO nih hin ZRO/ZRA le CNF/CNA kaphnih hruaitu cu bia a ruah veve cang hna i kaphnih in remdaihnak ser an duh caah thaizing July 27, chun suimilam 12:00 ah Lalmuanpuia Punte, ZORO Vice President & Adviser to CM (Political) khan chung ah ZRO/ZRA hruaitu le CNF/CNA hruaitu cu tonbiaruahnak an ngei lai, tiah theih a si. The Chin Post
Thawngpang dang: Kan Chin hrinsor Mizoram hrambunh Zo Reunification Organization (ZORO) hruainak in Chinland ralkap CNF/CNA le Zo Revolution Army (ZRO/ZRA) hna cu thaizing 2024 Chiapa 27 ah tonnak an ngei lai.
Zo Reunification Organization (ZORO) nih CNF/CNA le ZRO/ ZRA kar kahdohnak ah remdaihnak um kho dingin palai an tuan i kaphnih hruaitu tonnak an ngeih hna. ZRO/ZRA hi India nichuahlei Manipur ramkulh miphun le miphun kar buainak a chuah hnu kum 1993 hnulei ah a chuak mi hriamtlai bu an si.
ZRO/ZRA hi kum 2005 ah India cozah hnatlaknak in ramri hngaktu ralkap bantukin Manipur ram ah hramsih in Myanmar ram kong ah a rak i thlak lem lo. Asinain kum 2021 Myanmar rambuai hnuah ZRO/ZRA kuttang ZRA-Eastern Command ralkap hna hi East Lairam chung ah ralhraang dohkalhtu CDFs a dohtu an si.
Tedim, Tonzaang, Cikha peng ah hmun an khuar theo i CDFs riahbuk hna zong an nam pah lengmang hna hnuah CNF/CNA cu an va kah pah lengmang hna. 2024 Biangreithlep ah Chinland Cozah , runvennak zung hruainak in Tonzaang khuapi laaknak ah ralhraang le ZRA-EC hi an i bawm.
Cucaah Chin hrinsor hna i doh cu ZORO an lung a nuamh lo caah remdaihnak um kho dingin kar an hlaang.
Zo Reunification Organization (ZORO) hi British nih rak thenmi Chin hrinsor hna India, Myanmar, Bangladesh i a umkmi hna i funtom duhtu le cawlcangmi an si. The Lairam Times
Leave a Reply