Hualngoram Chung Ah Hriamnam He Cawlcangh Aa Tim Mi Paoh Kan Kham Hna Lai Tiah HAB Nih Thanh. Chinram, Hualngoram chung ah hriamnam i put in kahdohnak tuah a tim mi paoh cu kan kham hna lai tiin a luancia Jul 20 ni ah Hualngoram hruaitu 50 hrawng nih biachahnak an rak ngeih mi cu Hualngoram Administrative Board(HAB) nih nihin July 23 ah an thanh.
Hualngoram chung ah hriamnam he a lut mi cheukhat nih dik lo tuk in Hualngoram mizapi nawlngeihnak laak an i timh caah mizapi ṭihphannak in an khah kan hmuh i, cu bantukin Hualngoram chung ah hriamnam he kahdohnak tuah a tim mi paoh cu kan kham hna lai, tiah Hualngoram Administrative Board(HAB) nih mizapi sin ah theihternak an tuah.
“Hualngoram chung ah hin hramhram in nawlngeihnak a latu SAC ralkap an um ti lo i zatlang ukhruainak zong ṭha tein kalpi cuahmah lio a si. Mizapi an ngandamnak, fimcawnnak hna cu biapi ah chia in zulhphung ṭhate he i ṭhithruai lio a si bantukin mizapi an zalonnak chuh timh in thawngpang dik lo a thanhtu le hriamnam he kahdohnak kalpi a timtu paoh cu Hualngoram mizapi nih kan thazaang dihlak chuah in kan kham hna lai,” tiah Hualngoram Administrative Board(HAB) nih cun theihternak cathanh an chuah. The Chin Post
Thawngpang dang: Chinram, Thantlang peng ah hrambunh in hriam a tlai mi CDF-Thantlang, Tilim Operation 4 ca ah tiin GTRO—New Zealand nih tangka Ks 30,700,000 bawmhnak an pek, tiah theih a si.
New Zealand ram ah a um mi Global Thantlang Relief Orangaization (GTRO) chungtel hna nih CDF-Thantlang rianṭuan cawlcanghnak ah Emergency Fund ca ah tangka Ks 30,700,000 bawmhnak an pek mi cu a luancia July 20 ni ah tlamtling tein an hmuh kong, CDF-Thantlang nih an thanh.
“GTRO—New Zealand nih Chinland Defense Force – Thantlang rianṭuan cawlcanghnak ca ah MMK 30,700,000/- (Emergency Fund) nan kan bawmh mi cu July 20 ni ah khan tlamtling tein kan hmuh. Nan kan dirkamhnak cung ah kan i lawm tuk,” tiah CDF-Thantlang nih GTRO—New Zealand sin ah an lunglawmhnak an langhter.
Leave a Reply