Zualko: Tuzing kahdohnak ah CDF-Zophei paraltha Salai Ram Hei Mang mual a liam. Tuzing Hakha le Thantlang karlak SAC Camp 3 cu Chinland ralkap hna nih an kahdoh hnu ah an laak khawh tiah theih a si. Hi kahdohnak ah Ralhrang meithal le hriamnam an laak khawh pin ah ralhrang a thi mi zong an tam. Chin ralkap lei in CDF- Zophei Salai Ram Hei Mang nih a nunnak a pek tiah kan theih. “Sian lo ka nau na ttil ruangmang ai mu. Ram le miphun caah na biakam na tlinh ee ka nau.
A fim tuk mi, chimh ngai tuk mi, muidawh, pumrua ttha, bawlung chuih thiam tuk mi, pasal ttha tuk mi ka nau. A cutluk kan sian lo cu dah! Na kum a no tuk rih, nan unau lak ah upa bik na si fon, ziah CDF cun na luh ve kan ti ahkhan, ka uu kanmah chan ah kan tei lo cun si kho lo na ka ti kha ka nau! Kan siang lo tuk ee! Ka ngaihchiatnak mitthli ka hnawt cawk lo ka nau. Ka lung a kuai bak.
Hitluk in ram caah ti’n kan pasal ttha rual nih an nunnak le an pum an pek ahhin ramdang a tthang mi mino tangka thawh cu chim lo, kan ram ah zeidah a cang timi hmanh a thei lo mi kan tam tuk rih! Ramdang phanmi kan mino hna kan in bochan hna an kan ti. Bochan awk kan hei tlak lo ning! Nan degree sangsang le nan rian ttha tlaih mi cu PAKPALAWNG. Ningzak kan si. A poi ka ti!
Salai Ram Hei Mang – pasal ttha, upatnak sang bik kan pek” tiah Biak Tha Par Sakhong nih a ngaihchiatnak a langhter.
Thawngpang dang: Hakha-Thantlang Kar SAC Ralkap Sakhaan 3 CNA le CDFs nih an Laak Cang. Hakha le Thantlang karlak ah a um mi SAC ralkap hmunkhuarnak pawl cu July 21 zaan thawk in Chinland Council chungtel CNA le CDFs ralkap pawl nih doh hram an thawk i sakhaan pathum an laak khawh cang, tiah CNF/CNA chimnak nawlngei Salai Htet nih a fehter.
Salai Htet Ni nih, “Hakha le Thantlang karlak ah a ummi SAC ralkap sakhaan pawl thianhhlimhnak kan tuah hna. Sakhaan pathum kan laak cang. Atu hi a dang sakhaan pakhat kan doh lio a si,” tiah media ah a chim.
Lungkhar SAC ralkap hmunkharnak le Auto tlang cu “Tilim Operation 4” min in CNA le CDFs ralkap pawl nih an doh i, nihin zinglei ah khan Lungkhar ah a ummi sakhan pawl an laak khawh cang i Auto tlang sakhaan a taang.
Bawmhnak pek ding in Hakha khua in SAC ralkap mawtaw pahnih zong nihin zinglei ah khan an i thawh, tiah tualchungmi nih an chim.
Lungkhar ah a ummi CNA le CDFs ralkap hmunkharnak pawl cu 2023 May thla thih lei ah khan SAC ralkap nih faak piin an rak doh i, June thla zarh khatnak ah an rak laak khawh. SAC ralkap nih Lungkhar an laaknak kum khat fai a rauh hnu ah CNA le CDFs nih Lungkhar an laak khawh ṭhan hi a si. July 22 || The Hakha Post
Leave a Reply