Zualko: Singapore ram a ummi Pu Ral Lian Kap mual a liam. Pu Ral Lian Kap (kum 42, Thantlang peng Dawn khua) nih Singapore ram ah mual a kan liam taak tiah theih a si.
“Pu Ral Lian Kal cu Singapore ram ah rianṭuan ding in 2015 ah a rak phan. Keppel Shipping tang Alpine Engineering company ah kum 9 tluk a ṭuan hnu tukum May thla ah ruahlo tuk in thin cancer zawtnak a ngeih caah Ng Teng Fong General Hospital ah zarh thum thluk aa thlop hnuah nizan July 20, 2024 (Sunday) zing 10.15am ah a dawtu Pathian sinah a kan dinh tak cang. A takpum cu thaizing (23 July) ah vanlawng in Kawlram ah tlunpi a si lai” LCF Singapore nih ngaihchiatnak an langhter.
Thawngpang dang: Hakha-Thantlang Kar SAC Ralkap Sakhaan 3 CNA le CDFs nih an Laak Cang. Hakha le Thantlang karlak ah a um mi SAC ralkap hmunkhuarnak pawl cu July 21 zaan thawk in Chinland Council chungtel CNA le CDFs ralkap pawl nih doh hram an thawk i sakhaan pathum an laak khawh cang, tiah CNF/CNA chimnak nawlngei Salai Htet nih a fehter.
Salai Htet Ni nih, “Hakha le Thantlang karlak ah a ummi SAC ralkap sakhaan pawl thianhhlimhnak kan tuah hna. Sakhaan pathum kan laak cang. Atu hi a dang sakhaan pakhat kan doh lio a si,” tiah media ah a chim.
Lungkhar SAC ralkap hmunkharnak le Auto tlang cu “Tilim Operation 4” min in CNA le CDFs ralkap pawl nih an doh i, nihin zinglei ah khan Lungkhar ah a ummi sakhan pawl an laak khawh cang i Auto tlang sakhaan a taang.
Bawmhnak pek ding in Hakha khua in SAC ralkap mawtaw pahnih zong nihin zinglei ah khan an i thawh, tiah tualchungmi nih an chim.
Lungkhar ah a ummi CNA le CDFs ralkap hmunkharnak pawl cu 2023 May thla thih lei ah khan SAC ralkap nih faak piin an rak doh i, June thla zarh khatnak ah an rak laak khawh. SAC ralkap nih Lungkhar an laaknak kum khat fai a rauh hnu ah CNA le CDFs nih Lungkhar an laak khawh ṭhan hi a si. July 22 || The Hakha Post
Leave a Reply