Lawmhnak A Tam Chinchin Ko Ee: UPDATE CDF-Hakha Nih Hakha Khuapi Palik Sakhan An Kah Mi Update. Thongtla 63 Leng An Chuah Hna Hnu Ah Hriamnam Ceilak An Lak Khawh Rih

CDF-Hakha Nih Hakha Khuapi Palik Sakhan An Kah, Nu 13 Telh In Thongtla Mi 63 Le Hriamthil Zeimawzat An Zaampi Hna. Chinram, Hakha khuapi um palik sakhan cu CDF-Hakha nih an kah i palik 4 an thih pin ah nu 13 telh in thongtla mi minung 63 le hriamthil zeimawzat cu CDF-Hakha nih an zaampi hna, tiah theih a si.

“Nihin 2024, July 20 ni zinglei suimilam 5:30 tluk ah Hakha khuapi um palik sakhan cu CDF-Hakha nih an kah i palik 4 cu hmunril ah an thi. Cu pin ah thongtla mi nu 13 le pa 50, an dihlak minung 63 cu CDF-Hakha nih a himnak hmun ah an zaampi hna i SAC ralhrang lei in meithal zuun 24 le hriamthil dangdang zong an laak chih khawh,” tiah CDF-Hakha ṭuanvo ngeitu pakhat nih Lungmili Post ah a chim.

Kan ralkap hna le thongtla mi hna cu a himnak hmun an phan dih cang i atu hi Hakha khuapi kiangkap ah kan ralkap hna nih hmunhma an laak dih cang. Mizapi nih a lamkip in kan ralkap hna hi pehzulh in thazaang pe hna usih, tiah a chim chap. Lungmili Post | Chipa 20 | 2024

Thawngpang dang: Mizoram ramkulh, Lawngtlai in hmun dang ah eidin tirawl phurh a ngah ṭhan cang, tiah CYLA nih nizan July 18 ah an thanh hnu in Mizoram—Chinram, Paletwa chawlehnak lampi zong hman a ngah ṭhan cang, tiah theih a si.

CYLA nih nizan July 18 zan thawk in Lawngtlai in hmun dang ah eidin tirawl phurh an onh cang nain Petrol le Diesel phurh tu cu an kham ṭhiam. Thil phurh kong ah hin YLA Branch kip nih mahle sang chung in a chuak ding mi motor paoh an zohfelpi hna lai i YLA Branch kip nih pehzulh in an sang cio chekhlatnak an tuah lai, tiah theih a si.

“Myanmar ram lei i thil phurh duh ahcun zinglei suimilam 5:00-8:00 kar le zan suimilam 9:00-11:00 kar ah phurh khawh a si i chun hrimhrim ah Myanmar ram lei ah thil phurh a ngah lo. Caan rikhiah mi chung i thil a phur lo mi dawr ngei le kudawng ngei pawl cu YLA nih kharpiak an si lai. Cu pin ah thilri ṭhumthlak tik ah sang mi hnacheh lo ding le motor nunter in hnahnawhnak pek hrimhrim lo ding,” tiah Lawngtlai-III YLA nih nihin July 19 ah an thanh.

Chinram chung ah Rakhine ralkap AA pawl duh paoh in an cawlcangh i kahdohnak an tuah hnu in Mizoram in Chinram, Paletwa–Rakhine ramkulh lei pehtlaihnak chawlehnak lampi cu CYLA nih a luancia June 24 ni thawk in an rak khar.