Hallelujah Tiin Nan Kut Van Benh Cio Ulaw. CDF Hakha + CC Ralkap Nih Thawngpang Tak Tuk Hringhran Mi A Kan Phorh Ee

Breaking News : Hakha  thonginn cu July 20 deilei ah CDF Hakha +CC ralkap nih an luhhnawh hna i Thonginn cawng palek pathum an kah hna hnuah Thongtla 67 hna cu hmunhimnak leiah an zaampi hna tiah kan theih. Thonginn cawng Palek dang hi a zaam an um le umlo fiangin kan thei kho rih lo.Tuhi Hakha khuachung ah SAC an tamtuk caah umkal i ralrin cio ding si lai.  A langtlang thawnglak si caah theih palh sual mi um aikun remh le chap khawh kan hun i zuam te lai. Salai William Hc

The Chin Post: Breaking News CDF-Hakha Nih Hakha Thonginn An Kah, Palik 3 An Thi, Thongtla 62 An Luat. July 20, 2024, zinglei ah CDF-Hakha nih Hakha thonginn cawngtu palik cu an kah hna i palik 3 an thi, palik 5/6 hrawng cu an zam manh i thongtla 62 an luat tiah theih a si.

Thongtla a luat mi 62 chung ah nu 13 an i tel. Thongtla a luat mi hna chung ah hriamtlaih in dohthlennak tuah ruangah tlaih i kum 30 renglo thongdan pek mi mipi ralkap cheukhat zong an i tel tiah CDF-Hakha hruaitu pakhat nih The Chin Post ah a chim.

Thawngpang dang: Mizoram ramkulh, Lawngtlai in hmun dang ah eidin tirawl phurh a ngah ṭhan cang, tiah CYLA nih nizan July 18 ah an thanh hnu in Mizoram—Chinram, Paletwa chawlehnak lampi zong hman a ngah ṭhan cang, tiah theih a si.

CYLA nih nizan July 18 zan thawk in Lawngtlai in hmun dang ah eidin tirawl phurh an onh cang nain Petrol le Diesel phurh tu cu an kham ṭhiam. Thil phurh kong ah hin YLA Branch kip nih mahle sang chung in a chuak ding mi motor paoh an zohfelpi hna lai i YLA Branch kip nih pehzulh in an sang cio chekhlatnak an tuah lai, tiah theih a si.

“Myanmar ram lei i thil phurh duh ahcun zinglei suimilam 5:00-8:00 kar le zan suimilam 9:00-11:00 kar ah phurh khawh a si i chun hrimhrim ah Myanmar ram lei ah thil phurh a ngah lo. Caan rikhiah mi chung i thil a phur lo mi dawr ngei le kudawng ngei pawl cu YLA nih kharpiak an si lai. Cu pin ah thilri ṭhumthlak tik ah sang mi hnacheh lo ding le motor nunter in hnahnawhnak pek hrimhrim lo ding,” tiah Lawngtlai-III YLA nih nihin July 19 ah an thanh.

Chinram chung ah Rakhine ralkap AA pawl duh paoh in an cawlcangh i kahdohnak an tuah hnu in Mizoram in Chinram, Paletwa–Rakhine ramkulh lei pehtlaihnak chawlehnak lampi cu CYLA nih a luancia June 24 ni thawk in an rak khar.