20 July 2024 : Rakhine Maungdaw peng ShweZa khuate pawng ah AA le Rohingya hriamtlai karlak ah kahdohnak a chuak. Rakhine ram, Maungdaw peng ShweZa khuate pawng ah Arakan Army (AA) le Rohingya ralkap (RSO) karlak ah kahdohnak faak pi a chuak tiah tualchungmi pakhat nih a chim. Nizan july 19 chun ah Shweza khuate pawngah chunnitlak kahdohnak a chiak i, kap hnih in a thi le hliam an tam kho tiah a chim.
Culawng si loin Kagyinchaung Sipuazi zung chung zong ah nizan zanlei suimilam 3:00 in 8:00 pm tiang AA le RSO karlak kahdohnak a chuak i, Rohingya ralkap lei in thi an um lo, hliamtuar balte 5 an um. AA lei in minung 20 an thi i, tam ngai an i hliam tiah theih a si. AA ralkap hi ai hliam 30 hrawng an si kho, A thi le ai hliam an tam caah AA hi hnu an pil chung tiah theih a si.
Thawngpang dang: Mizoram ramkulh, Lawngtlai in hmun dang ah eidin tirawl phurh a ngah ṭhan cang, tiah CYLA nih nizan July 18 ah an thanh hnu in Mizoram—Chinram, Paletwa chawlehnak lampi zong hman a ngah ṭhan cang, tiah theih a si.
CYLA nih nizan July 18 zan thawk in Lawngtlai in hmun dang ah eidin tirawl phurh an onh cang nain Petrol le Diesel phurh tu cu an kham ṭhiam. Thil phurh kong ah hin YLA Branch kip nih mahle sang chung in a chuak ding mi motor paoh an zohfelpi hna lai i YLA Branch kip nih pehzulh in an sang cio chekhlatnak an tuah lai, tiah theih a si.
“Myanmar ram lei i thil phurh duh ahcun zinglei suimilam 5:00-8:00 kar le zan suimilam 9:00-11:00 kar ah phurh khawh a si i chun hrimhrim ah Myanmar ram lei ah thil phurh a ngah lo. Caan rikhiah mi chung i thil a phur lo mi dawr ngei le kudawng ngei pawl cu YLA nih kharpiak an si lai. Cu pin ah thilri ṭhumthlak tik ah sang mi hnacheh lo ding le motor nunter in hnahnawhnak pek hrimhrim lo ding,” tiah Lawngtlai-III YLA nih nihin July 19 ah an thanh.
Chinram chung ah Rakhine ralkap AA pawl duh paoh in an cawlcangh i kahdohnak an tuah hnu in Mizoram in Chinram, Paletwa–Rakhine ramkulh lei pehtlaihnak chawlehnak lampi cu CYLA nih a luancia June 24 ni thawk in an rak khar.
Leave a Reply