Khrihfabu 120 In Dirh Mi A Si I Member Zapi Minung 30,000 Leng An Um Nak A Simi CBCUSA Nih AA Pawl Cu Chinram Chung In Chuak Zawkzawk

Arakan Army – AA nih Chin ram ah lut in Chin dothlennak ah an i teltum mi cu ngol dingah Chin Baptist Churches USA,Peace and Justice Committee nih nizan July 15 ah thawng an thanh. Peace And Justice Committee cu AA hna nih Chin ramkulh ah an cawlcangh caah Chin miphun hna inn le lo,ngeih le chia le nunnak kongkau ah lungrethei in a um.AA nih Chin ramkulh dohtlennak ah an i teltum ve ruang ah Chin mi khat le khat lungrual nak lei kar hlan nak ah dawnkhan tu lian pi ah an cang.cu caah AA hna Chin ramkulh chung cawlcangh cu kan duh lo i a ran nak in ngol din in kan in theih ter hna tiah an thanh.

A tu ah Chin ram chung SAC sakhaan tam deuh cu dothlennak ralkap phu hna kut chung a phan cang nain Chin mi phukhat le phukhat karlak ah i hmuh thiam lo nak tete a um i cucu Chin ram vialte SAC kut chungin a luat khawh nak hnga le Federal ramkomh sersiam nak ding ah dawn khan tu an si hna.cu a si caah Chin dothlennak phu khat le phukhat kar a ran nak in daihnak a um khawh nak hnga hma la cio ding in kan in nawl hna.Chin mi fialte kan i fumtom khawh i tuanbia thar kan tial khawh nak hnga Peace And Justice Committee cu thazaang a chuah peng lai tiah an langhter.

Cu pin  ah Chin miphun hna chungin online chung ah huatnak a karh ter tu caa le bia tial leng mang lo dingin le khat le khat rem nak a um khawh nak hnga ding tu i hmaithlak cio ding in nawl nak an tuah fawn. CBCUSA cu American ram i pengkomh 25 chung in khrihfabu 120 in dirh mi a si i member zapi minung 30,000 leng an um nak a si.2021 SAC nih hramhram in uknak a laak hnu ah kha hlan Chin Advocacy Committee cu CBCUSA nih Peace And Justice Committee ah a thlen i ramkhel lei le miphun rian ah tuanvo laa dingin an rak dirh mi a si.