AA Chinram An Luh Ruangah Kan Thin Phang Hlah Seh.Thil sining le thawngpang tete theih peng nan duh ah cun, The Chinland Information page hi (follow) rak tuah ve ko. 16 July 2024- Chin Brother-hood nih an sawmh mile, Chin Brother-hood bawmhnak thawngin Chinram a ra lut mi AA hna kongah mipi kan thinphang awk a silo.
Chinland Council ralkap CNA timh tuahnak tha tein an ngeih ve cang. A rau hlanah Chinram in an dawi tthan cawlh hna lai. Chinland Council hruitu hna nih CNA ralkap suallam ngeih lo in ral an dohter ballo. Timh tuahnak tha te an ngeih hnuah an ralkap hna ralram ah an thlah ton hna bantuk in, a caan a phan rilo, a hmunhma nih a peh rilo caah daih tein an um rimi si.
A herhnak zawn tete ah cun an kah ko hna mu. Ziah CNA nih AA le a ttangrual +SAC Ralhrang an kah lo e, vei lo e tiin kan zaih mikhi, a hmunah nan um velo caah khin thil sining nan theih lo bia si. Nifatin CNA ralram ah an kal peng i,ral an doh peng, a herhnak zawnah mipi theih dingah thawng ka van thlah ton le si. Chin Brother-hood lulak pawl bantuk in Online le media raldoh an sive lo caah, mipi sinah Thawngthanh ka van tuah lo bia si.
Relchap: Naypyidaw khuapi um Ayelar vanlawng bual cu nihin July 16 zing ah 107MM Shock Missile in an kah i van ralkap (Air Force) Officer 4 telh in SAC ralhrang 16 an thih pin ah raltuknak vanlawng 2 telh in vanlawng 3 le building pawl zong an rawk, tiah Mountain Knights Civilian Defense Force (MKCDF) in ṭuanvo ngeitu nih a chim.
Zing suimilam 9:00 tluk ah Ayelar vanlawng bual cu 107MM Shock Missile lung 7 in an kah i lung 5 cu an i tinhnak hmun ah a puak i van ralkap Officer 4 telh in SAC ralhrang 16 an thi. Cu pin ah A-5 Bomber Jet Fighter 1 cu hman awk ṭha lo in a rawk i a dang Jet Fighter 1 le Y-12 Military Transport Aircraft 1 zong an rawk, tiah theih a si. Cu bantuk ṭhiam in building 4, hriamnam chiahnak inn 1, vanlawng remhnak thilri chiahnak inn hna cu an kaang i van ralkap Officer 3 le a dang SAC ralhrang 7 zong an tlau, tiah Khit Thit nih a ṭial.
Kahdohnak cu Mountain Knights Civilian Defense Force (MKCDF) le Mercury Revolution Force (MRF) nih Brave Warriors for Myanmar (BWM) hruainak in an kalpi mi a si i dohthlenak hriamtlai phu hna cu him tein hnulei an pil kho ṭhan, tiah theih a si. Kahdohnak a daih hnu ah SAC ralhrang pawl nih Ayelar vanlawng bual pawng um khuate 7 cu meithal puah bu in an luhhnawh i tualchung mi 12 cu a ruang um lo in an tlaih hna, tiah theih a si.
“Naypyidaw khuapi luhnak lam cu July 12 thawk in atu tiang humhimnak an laak. Kan ralkap hna nih Ayelar vanlawng bual an kah bak in SAC ralhrang pawl nih an zumhnak hmun paoh cu an kulh dih i khuate 7 cu luhhnawh in mi an kawl. Khua kiangkap thlai cinnak hmun pawl cu hriamhme le seh meithal in an kah i an lunghrinh mi hna minung 12 cu an tlaih hna i an kalpi hna,” tiah Mountain Knights Civilian Defense Force (MKCDF) in ṭuanvo ngeitu nih a chim. Naypyidaw khuapi um Ayelar vanlawng bual cu atu tan he hin a voi 5nak an kahdoh a si cang, tiah kan theih.
Leave a Reply