Shan ramkulh chaklei, Laukkai hmunram chung kahdohnak ah ṭuanvo rak pek mi Operation Command Headquarters i Major General Zaw Min cu SAC nih thihdan an pek kong, Naypyidaw ral lei thawng laaknak hrampi nih an chim.
A luancia March thla chung ah khan Online in tangka hlen kong he pehtlai in Major General Zaw Min, Deputy Defence Minister Major General Aung Lin Tun, Eastern Command Commander Major General Hla Moe le Nothern Command Commander Major General Soe Hlaing cu an tlaih hna i May thla chung ah Zaw Min telh in Major General pawl cu thongthlak an si pin ah an ngeih mi thil vialte an chuh dih hna. China lei nih halnak an tuah bantukin July thla hramthawk ah Major General Zaw Min cu SAC nih thihdan an pek i Daik-U thonginn ah an kuat, tiah theih a si.
A luancia January 4 ni ah SAC ralkap le an chungkhar zate minung 4,000 leng cu MNDAA sin ah hriamnam chiah in an rak i ap hnu ah SAC nih Major General le Brigadier General pathum cu SAC nih thihdan a pek cang hna i July thla hramthawk ah Major General Zaw Min zong SAC nih thihdan an pek ve. Zaw Min he tlaihṭi mi Deputy Defence Minister Major General Aung Lin Tun, Eastern Command Commander Major General Hla Moe le Nothern Command Commander Major General Soe Hlaing zong kum 1-15 kar thong thlak ding in SAC nih bia an khiahpiak ve hna, tiah theih a si.Crd: Thechinpost
Thawngpang dang: Chinram-Magway ramṭhen ramri hmun khat ah CNF/CNA nih an rak tlaih mi hna YDF ralkap pahnih cu nihin July 12 ah thlah ṭhan an si cang kong, YDF ṭuanvo ngei pakhat nih a chim.Crd: Chin News
“CNF/CNA nih nihin ah an thlah ṭhan cang hna, kan sin belte ah an phan rih lo. Anmah he zong ṭha tein kan i pehtlai kho cang. Ceihmainak zeihmanh a um rih lo i kan ralkap pahnih an phanh hnu ah zei bantuk dah an ton tibantuk le thil sining cu dikhliar in chim awk a ṭha te lai,” tiah YDF hruaitu pakhat nih a chim.
Chinram, Matupi peng le Magway ramṭhen, Gangaw peng ramri, Zawngnak khua ah a luancia July 7 ni ah rak tlaih mi YDF thilri lei tlaitu ṭuanvo ngei ralkap Oke Thein le YDF thilri lei tlaitu chungtel ralkap Aung Thet Khine cu ni 6 a rauh hnu ah CNF/CNA nih an thlah ṭhan cang hna, tiah theih a si.
YDF ralkap pahnih tlaih an ton hnu in Chinram lei ah kai aa tim mi motor 70 leng cu YDF nih Gangaw peng ah an kham dih hna i nihin tian an hren rih hna. YDF ralkap pahnih sakhan an phanh hnu lawng ah motor lampi hon an timh kong, YDF in ṭuanvo ngei pakhat nih cun a chim. Yaw Defense Force (YDF) cu Matupi khuapi kahdohnak ah Rakhine ralkap AA kuttang ah ral a tu ve mi hriamtlai phu khat an si.
Leave a Reply