Yaw Hriamtlai Phu YDF Ralkap Pahnih Cu CNF/A Nih An Tlaih Hna. Magway ramṭhen, Gangaw pengkomh chung ah hriamtlai phu khat a si mi Yaw Defense Force (YDF) ralkap pahnih cu July 7 ah CNA ralkap nih an tlaih hna, tiah Yaw Alintan phu nih an chim.
Gangaw peng le Matupi peng ramri Zawngnak khua ah YDF ralkap pawl an um lio ah CNA ralkap cheukhat nih July 7 zanlei ah an tlaih hna i zeiruang ah dah an tlaih hna ti cu fiang in theih a si rih lo, tiah Yaw Alintan in ṭuanvo ngei pakhat nih a chim.
“CNF/A le YDF kar ah zeibantuk buainak hmanh a um bal lo. YDF hruaitu pawl nih cun an ralkap tlaih an ton cu an fehter ko. CNF/A lei pehtlaih khawh an si rih lo caah zeiruang ah dah an tlaih hna ti fiang in theih a si rih lo,” tiah Yaw Alintan in ṭuanvo ngei pakhat nih cun a chim.
July thla chung ṭhiamṭhiam ah CNA ralkap 18 nih hriamnam tling he Yaw hmunram chung um Pah-Kah-Phah Checkgate ah kal in YDF konglam an hal hna hnu ah Pah-Kah-Phah an si an i fian hnu in hnu an tolh ṭhan kong zong Yaw Alintan in ṭuanvo ngei pakhat nih cun a chim chap.
Yaw hmunram chung ah hin hriamtlai phu dang zong an um i CNA Battalion pathum hrawng an um ve caah atu bantukin tlaihkhihnak an tuah mi ruang ah hriamtlai phu kar ah i hmuhthiam lonak chuak in buainak a karh sual lai an phan kong tualchung mi nih an chim.
Hi kong he pehtlai in Yaw Defence Force General Headquarters nih cun, “CNF/A nih a ruang um lo in YDF ralkap pahnih nan tlaih mi hna hi a rannak in kan thlahpiak hna u,” tiah nihin July 9 ah cathanh in an langhter.
“YDF ralkap pahnih an tlaih mi hna hi cu chikkhat ca i biaruahnak ngeihpi ding ah an tlaih mi hna a si ko. Kan kar ah zeibantuk huatnak hmanh a um lo i upate he biaruahnak an ngeih hnu ah a tlamtling dih ko lai,” tiah CNF/A chimnak nawlngei Salai Htet Ni nih Chin World Media ah a chim ve. The Chin Post
Thawngpang dang : Chin Miphun Caah Pathian Nih Chiti A Thuhmi, Chin Khrifa Ah Kan Pa, Rev. Dr. Hre Kio Nih Chin Miphun A Kan Umpitu Pathian Thlarau, Kan Sin In A Chuah Sual Ahcun, Kan Irawk Dih Lai. Kan Ithah Dih Lai Tiah A Chimmi Hi Pathian Biathli A Si Kho Tiah Ka Ruah Ko. Saul Siangpahrang pa nih David thah ding in a rak dawi lio ahkhan, Pathian thlarau cu Saul Siangpahrang sin in a rak chuak diam cang, asinain Saul nih a rak thei lo.
Pathian thlarau kan sin ah a chuah ahcun, Pathian ral kan si colh. A ruang cu, Pathian thlarau a um lonak hmun paoh cu, Evil nih a rolh colh ve caah a si. Evil nih hmunhma a luahnak Community, Organization, le Miphun cu, rawhralnak, thinphannak, le thihnak lawngte an si ko lai.
Nihin, Ram rian he pehtlai in Chin miphun a kan hruaitu hna nun ka zoh tikah ka thin a phang. Zeicatiah, Zuu an ding. An ri. “Keimah timi le kanmah thawng” timi aw a thang. Rev. Dr. Hre Kio nih ruamkai hi a kan hrawktu, a kan thenthektu a si tiah dengtheu tein kan dirhmun a langhter tikah, Pathian thlarau nih a kan kaltak hnik cang hlah maw! or a kan kaltak diam cang dah!
Nihin kan pah cuahmahmi thil hi kan irawh chinnak a si lai timi kan hngalh ko. Aa fiang ko. Asinain kan pah chih thluahmah ko mi hi, kan thinlung ah Pathian thlarau siloin, Evil thlarau a um cang caah a si hnga maw. Fakpi in ruah a phu ko!Crd: Zasang Cinzah
Leave a Reply