ZRA Nih Kum Tlinglo Mino Minung 8 An Tlaih Hna. Zoh Hna Hmanh Uh Zaangfah Tete An Si Ning Cu Mu

Chin ramkulh,Tedim peng Tungzang khuate i kum 13 tluk mino kum tlinglo tete minung 8 cu Zomi Revolutionary Army – Eastern Command (ZRA – EC) nih July 6 ah khan an tlaih hna i  an kal pi hna tiah thawng theih a si. Tedim khua he meng 20 tluk aa hlat nak in a um mi Tungzan khuate ah hin ZRA-EC hna cu July 6, Zarhteni ah khan arak phan i cu khuate i ngakchia hna cu camcawhfung an zuh ter hna hnu ah minung 8 an kalpi hna hi a si.

“khuachung ah inn khat hnu in khat in an kai i pa ngakchia an umnak poah camcawhfung an zuh ter hna.tang 4/5 a kai lio mi tete an si hna.a tu cu tang 4 in a cunglei pa ngakchia pawl khua ah an um ngam ti lo i an zaam hna.” Tiah Tedim khuami pakhat niha  chim.

ZRA-EC nih ngakchia pawl an tlaih hna i an kalpi hna caah Tungzang khuate tualchungmi hna zong khua ah um ngam lo in an tlizam hna tiah theih a si. Cu bantuk thiam thiam in Tonzang peng Cikha khua telhin Vom khute,Tanhsawl khuate,Khuadam khute hna zong ah ZRA ralkap lut dingin ZRA –EC lei nih hram hram in min cazin an laak hna tiah theih a si.

Thawngpang dang AA Nih Tualchung Mi An Tlaih Mi Hna Le Innzuat Saṭil Thah In An Eipiak Mi Hna Kong Ah Global Matupi CDF Supporting Committee Nih Cathanh A Chuah. Chinram thlanglei, Matupi peng chung ah Rakhine ralkap AA nih thazaang chap in umhmun an khuar mi, sualnak ngei lo tualchung mi an tlaih mi hna le innzuat saṭil thahpiak in an eipiak mi hna cung ah Global Matupi CDF Supporting Committee nih faakpi in an doh kong, nizan 2024, July 7 ah cathanh an chuah.

AA cu Matupi khuapi laak kahdohnak ah Chin Brotherhood nih an sawm i mah an sawm mi cu caanṭha ah i laak in Matupi peng chung ah thazaang a chap i khuate kip ah umhmun an khuar mi kan hmuh. Atu bantuk in AA nih Matupi peng chung ah thazaang a chap mi le ralkap sakhan a chap mi pawl cu Chin mi hna nuhrin covo kong le kan himnak ding kong ah kan lungre a thei ngaingai, tiah an langhter.

Cucaah AA ralkap vialte cu Matupi peng chung in nan chuah dih naklai kan in nawl hna, tiah Global Matupi CDF Supporting Committee nih cathanh ah an langhter chih. Lungmili Post