Kum 12 Lawng A Si Rih Mi Chin Nu Pakhat SAC Nih An Tlaihhrem. Kalay in laitlang lei ah rallam a sial mi SAC ralhraang hna nih Tedim peng Mualpi khua nu kum 12 lawng a si rih mi cu July 4 ah khan an tlaihhrem tiah theih a si i tlaihhrem a tongmi nute i hringtu a nu le a dang nu pakhat zong tlaihhrem an timh ve hna nain an zaam manh tiah theih a si.
SAC ralhraang hna an rak kai tiah thawng theih a si caah tlaihhrem a tongmi nute le a nu le cu lo thlam ah an zaam.cu tin khua thawngpang hlat awk ah ngakchia nute cu khua ah a va kir i boruak a that ko caah zaanriah a chum len beh. Cu tin SAC ralhraang 2 an rak lut i ngakchia nute an tlaih hrem hi a si.
Ngakchia nute an tlaihhrem lio ah hin a cawl a cang i a au len ko nain an pawngkam um SAC nih an thloh hlei hna lo tiah theih a si. Cu thil a chuak mi kong ah khua upa hna nih SAC rallamsial mi hna i hruaitu sinah report an pek i SAC lei nih cun phaisa pek in daihter an timh tiah theih a si. July 4 ah khan Kalay in SAC ralhraang hna cu motor 6 khat in laitlang lei panh in an kai hna i a thaizing July 5 ah an kir than hna tiah theih a si. CBN Daily News
Thawngpang dang: Chinram, Tedim peng, Mualpi khua ah kum 12 ngakchia nute cu SAC ralhrang cheukhat nih an tlaih hrem, tiah theih a si. 2024, July 5 ah Klaymyo in Chinram lei ah motor pawl he a rak kai mi SAC ralhrang cheukhat nih kum 12 ngakchia nute an tlaihhrem i a dang fa ngei cia nu 1 le ngakchia nu 1 zong SAC ralhrang cheukhat nih tlaihhrem an timh hna nain an chuakzaam khawh caah annih 2 tu cu an luat, tiah tualchung mi hna nih an chim.
“July 4 ah motor pawl he SAC ralhrang pawl an rak kai caah ngakchia nute cu a chungkhar hna he lo/thlam ah an i dor. July 5 ah SAC ralhrang pawl nih inn ah tlun a ngah cang an ti caah ngakchia nu cu inn va zohta ding in a nu nih a fial i khuachung a dai cang tiin ngakchia nute cu rawl a chuan lio ah SAC ralhrang 2 nih an luhhnawh i an tlaihhrem. Ngakchia nute nih rak ka chanh uh tiin a au i inn pawngkam ah SAC ralhrang an tam ngai ko nain an chanh hlei lo” tiah tualchung mi pakhat nih chim.
Cu pin ah a dang fa ngei cia mi nu 1 le ngakchia nu 1 zong SAC ralhrang nih tlaihhrem an timh hna nain an i sual i an zaam khawh caah annih tu cu an luat. Khua mi hna nih an hruaitu SAC ralhrang bawi sin ah report an tuah i hlathlainak an tuah. Ngakchia nute cu tangka pek in daihter ding ah an i zuam, tiah a chim chap.
Ngakchia nu a tlaihhremtu SAC ralhrang 2 cu puan in an zual hna i motor cung ah an kaipi hna. Cu hnu ah an hruaitu SAC ralhrang bawi nih “Kan dirhmun a ṭha loh” a ti hna i Kalaymyo lei ah an kir, tiah tualchung mi hna nih an chim. SAC ralhrang pawl cu July 4 ah motor 6 he Kalaymyo in Chinram lei ah an rak kai hi a si i July 5 ah an kir ṭhan, tiah theih a si.
Leave a Reply