CNF/CNA He Aa Kap Kho Ṭhan Kan Si Tiin CDF-Matupi Brigade-1 Nih Matupi Khuapi Chung Lut Lo Ding In Mizapi Ralrin An Pek Hna. Chinram, Matupi khuapi ah a um mi SAC ralkap Khah-Mah-Yah 304, Khah-Lah-Yah 140 le Byuha sakhan cu Arakan Army(AA) hruai mi Chin Brotherhood nih nizan June 29 ah a ningpi in an laak hnu ah Chinland Council ralkap he zeitik caan paoh ah aa kap kho ṭhan mi an si kong an thanh i cu ruang ah mizapi cu khuapi chung le a kiangkap khua ah lut rih lo ding in CDF-Matupi Brigade-1 nih thawng an thanh hna.
“Matupi khuapi humhimnak, mizapi runven le an himnak ding cu biapi bik ah chia in, SAC nih vanlawng kahdohnak an tuah khawh pin ah SAC ralkap leiphum mi bomb thianhfelnak tuah lio a si fawn, kamkhat lei ah Chinland Council ralkap he zong zeitik caan paoh ah aa kap kho mi kan si caah khuapi chung luh ding kong he pehtlai in thawng kan thanh ṭhan hlan tiang khuapi chung le a kiangkap khua ah lut rih hlah u,” tiah mizapi ralrin an peknak cathanh an chuah.
“CDF-Matupi Brigade-1 nih Matupi humhimnak le sakremh ṭhannak kong ah pehzulh in rian kan kalpi lai i Chin hriamtlai phu dang pawl zong an si khawh tawk cio in kan telpi ding in kan sawm hna lai,” tiah CDF-Matupi Brigade-1 nih an langhter i Matupi khuapi sakremh ṭhannak, hliam a pu mi ralkap thlopbul zohkhenhnak le timhlamhnak nganpi he ṭuan timh mi rian kong ah mizapi nih pehzulh in kutsamh rih ko u, tiah nawlnak an tuah.
Thawngpang dang: A Voi 2nak 1027 Operation An Kalpi Hnu In Ni 5 Chung Lawng Ah Tualchung Mi 20 Leng An Thi I Minung 30 Nih Hliam An. Shan ramkulh thlanglei, Kyaukme peng, Nawnghkio peng le Mogok peng chung hna ah TNLA nih 1027 Operation tiin a voi 2nak kahdohnak a kalpi ṭhan hnu ni 5 chung lawng ah tualchung mi 22 nunnak a liam i minung 30 nih hliam an tuar, tiah Ta’ang National Liberation Army(TNLA) thawng laaknak hrampi nih a chim.
“Hi ni 5 chung kahdohnak caan chung ah hin SAC ralhrang nih hriamngan kahdohnak a tuah mi ruang ah le Drone, raltuknak vanlawng in bomb a thlak mi ruang ah atu bantuk in tualchung mi nunnak liam mi le hliam tuar mi an um hi a si” tiah TNLA thawng laaknak hrampi nihcun a chim.
TNLA nih 1027 Operation tiin a voi 2nak kahdohnak an kalpi ni thawkka June 25 ah tualchung mi 2 nunnak a liam i mimung 5 nih hliam an tuar, June 26 ah minung 4 nunak a liam i minung 15 nih hliam an tuar, June 27 ah minung 3 nunnak a liam i minung 3 nih hliam an tuar, June 28 ah minung 11 nunnak a liam i minung 4 nih hliam an tuar, nizan June 29 ah minung 2 nunnak a liam i minung 3 nih hliam an tuar, an dihlak fonh ah tualchung mi 22 nunnak a liam i minung 30 nih hliam an tuar, mah pin ah biaknak lei inn telh in inn cheukhat zong an rawk” tiah a chim chap.
Ni 5 chung kahdohnak caan chung ahcun Ta’ang National Liberation Army(TNLA) nih SAC ralhrang sakhan 24nak tlawm lo an laak khawh pin ah Major le Captain pawl telh in 53 nih TNLA ralkap sin ah an hriamnam chiah in an i ap, tiah theih a si.Crd: lungmilipost
Leave a Reply