Matupi Khuapi Le Tualchung Mipi Cun Kan Pasaltha Hna Caah Thlacam Bawmh Cio Hna Uh Si

Khuapi Chung Kahdohnak A Chuak Kho Ti Mi Thawngpang Ruang Ah Matupi Um Mi Cheukhat An Zaam Khuapi chung ah kahdohnak a fak kho ti mi thawngpang a leng mi ruang ah Chinram, Matupi khuapi ah a um mi hna cu thinphang thlalau in an um i a cheu cu a himnak hmun kawl in an zaam hna, khuapi chung cu a king ngaingai, tiah theih a si.

Matupi khuapi um mi pakhat nih cun, “Mizoram lei i a zaam mi an um i a cheu cu chungkhat an umnak khuate lei hna ah an zaam, khuapi chuahtak in zaam aa harh deuh mi lawng khuachung ah an taang,” tiah a chim.

SAC ralkap Byuha Battalion 3 an umnak Matupi khuapi ah khuapi chung i a biapit deuhnak hmunhma vialte cu SAC ralkap nih umhmun an khuarnak dih, a luancia ni tlawmpal chung zong ah Matupi pengkomh zung ah a um mi SAC ralkap pawl cu CDF-Matupi Vakok Battalion nih an rak kah hna, tiah theih a si. crd: the chin post

Chinram, Mindat peng, Circle 1 hmunram chung khua pakhat ah SAC ralkap nih raltuknak vanlawng in nizan June 4 zanṭim suimilam 12:00 hrawng ah bomb an thlak i tualchung mi pakhat nunnak a liam pinah, minung pathum hliam an tuar i inn thum a rawk dih, tiah Chin Defence Force – Mindat nih nihin June 5 ah an thanh.

Mindat peng chung cacawnnak sianginn, biaknak he aa pehtlai mi inn, siizung siikhan le umnak inn hna ah SAC ralkap nih timh ciammam tein bomb an thlak lengmang ruang ah lungkhur le i dupnak ding khur pawl fek tein sak cio ding in Mindat peng zatlang ukhruaitu phu nih nizan June 4 ah an thanh.

A luancia May 25 ni ah Mindat peng, Vawmthu khua siizung ah SAC ralkap nih vanlawng in pound 500 tluk a rit mi bomb 4 an rak thlak ruang ah siizung cu a ningpi in a rawk dih i mizaw le mizaw zohtu 5 an thih pinah minung 30 hrawng hliam an rak tuar.

Chinram chaklei Tonzaang khuapi, Cikha khuapi cu CNA hruai mo Chin hriamtlai ṭangṭi phu nih an rak laak cang i Tedim khuapi laak ding in Chin hriamtlai phu unau nih kahdohnak an kalpi ve lio a si caah Mindat khuapi zong ah kahdohnak a fak sual lai tiin khuapi um tualchung mi tam deuh cu khuapi chuahtak in an zaam hna, tiah theih a si.