Chin Hriamtlai Phu Kut In Hriamnam Tam Ngai Mizoram Ah An Tlaih Mizoram ramkulh, Siaha pengkomh, Tuipang khua lampi ah Assam Rifiles le Mizoram palik nih May 18 ah khan Chin hriamtlai phu kut in hriamnam tam ngai an tlaih, tiah theih a si.
“Tuipang lampi Assam Rifiles Mobile Vehicle Check Post (MVCP) ah duty in a um mi Assam Rifiles le Mizoram palik cu thawng pek cia an si bantukin thilri phur mi Kenbo-135 motorcycle cu dirter in chekhlatnak an tuah colh i Chinland Defence Force(CDF) nih an phurh mi round 17 kap kho mi Gauge Shotgun Carts 17, Baofeng Radio sets 14, Tactical Gear le Radio Set Chargers 14 an tlaih,” tiah Mizoram lei media nih an ṭial.
Tlaih a tong mi hi zei bantuk CDF an si fiang in an langhter lo. Cun, an tlaih mi Kenbo-135 motorcycle cu Tuipang palik sakhan ah an ap, tiah theih a si. crd: the chin post
Senthang Revolution Force (SRF) Battalion (2) sin ah Gangaw SAC palek pakhat cu meithal kuan pawl he nizaan May 19 ah khan a zaam, tiah theih a si.
SRF Battalion (2) sin ah a zaam mi palek pa hi Kyaw Zin Tun tiah an auh mi a si i, himnak hmun ah kuat a si cang, tiah thawngthanhnak ah an langhter.
Atu kum February thla ah khan Senthang mizapi tonpumhnak an tuah i, ahlan ah CDF-Senthang bu hnih in an rak um mi kha bu khat ah an i fonh i, Senthang Central Council/Senthang Revolution Force ti mi hi mizapi hnatlaknak in an rak ser.
Leave a Reply