Thantlang CDF hna zei tluk in dah an chungsivang lai kan inn kan lo a kan khangh piak dih tu ralhrang nih tuni tiangah kan khuachungah an duh poah an khuasa kho rih ko ruah ah hin an thinlung chung cun an cihmit dih cawl ding in nun thap bomb hna khi an va puah hnawh duh ko hnga asi nain cu ti lam um lo cu te nihin tiangah kum 3 tiang cu a van liam cang thantlang kan khuapi caah le kan miphun kan ram caah mino pasaltha 40 leng an nun nak a liam cang.
By, Pau Dohthlen Caan Kum Thum Leng Chung Ah CDF-Thantlang In Ralkap 40 Leng Nunnak A Liam Chinram, Thantlang peng chung ah hrambunh in pau dohthlennak ah a cawlcang mi Chinland Defense Force-Thantlang in ralkap 42 nih dohthlen caan kum thum leng chung ah ram le miphun ca ah nunnak an pek, tiah theih a si.
Pau dohthlen kum thum leng chung ah CDF-Thantlang nih kahdohnak voi 40 leng a tuah i ralkap 42 an nunnak a liam pin ah ram le miphun ca ah pum cheubang a pe mi zong an um, cu pinah SAC ralkap nih vanlawng in kahdohnak an tuah mi ruang ah tualchung mi 20 hrawng nunnak a liam, tiah theih a si.
“Kum 3 leng chung ah CDF-Thantlang nih kahdohnak voi 40 leng a tuah cang i ralkap 42 nih ram le miphun ca ah an nunnak an pek pin ah hliam a tuar mi zong an um, SAC ralkap nih vanlawng in kahdohnak a tuah mi ruang ah CDF-Thantlang hmunram chung um tualchung mi 17 nunnak a liam,” tiah CDF-Thantlang President Pu Uk Nun Bawi nih April 28 ni ah Global Thantlang Relief Organization(GTRO) ah a chim.
CDF-Thantlang nih a liamcia 2023 kum chung ah CNA hruainak in Thantlang khuapi chung ah kahdohnak (Tilim Operation) voi thum tiang an kalpi khawh i Thantlang khuapi chung ah SAC ralkap nih umhmun an khuarnak vialte cu luhhnawh in an rak kah dih.
“A liamcia 2023 chung ah Tilim 1 Operation in Thantlang palik sakhan kan rak laak khawh, Tilim 2 Operation in SAC ralkap nih umhmun an khuarnak Haukabung sakhan cu rak kah ṭhan a si i, Tilim 3 Operation in Thantlang khuapi chung SAC ralkap sakhan vialte cu voi khat kah ah rak kah a si,” tiah CDF-Thantlang President nih cun a chim.
“Cu kahdohnak ah SAC ralkap a thi mi le hliam a pu mi an tam i ṭangṭi phu lei zong in nunnak liam mi le hliam tuar mi an um ve, SAC ralkap sakhanpi cu kan laak khawh dengmang nain kuanfang le hriamnam nih a kan deih ti lo caah hnu kan rak tolh ṭhan,” tiah a chim chap.
CDF-Thantlang nih dothlennak caan chung ah kahdohnak lawng si lo in zatlang ukhruainak zong a kalpi i Thantlang peng, tlang 5 chung um khua 51 ah ukhruainak kalpi in zung 9 hon in ukhruainak an kalpi cuahmah, tiah theih a si.
Cu pin ah CDF-Thantlang nih an uk mi hmunram chung um khuate hna a daih khawh nakding ca le tualchung mi zalong tein an um khawh nakhnga Thantlang khuapi luhchuahnak pawl cu nifatin an hngah peng i SAC ralkap he zong an i kap lengmang, tiah theih a si.
Thantlang khuapi tualchung mi hna nih a liamcia 2021 February thla thawk in SAC ralkap hramhram nawlngeihnak duhlonak langhter in cawlcanghnak an rak tuah pin ah tuante ah hriamnam i tlaih in dohthlennak an tuah fawn. A liamcia 2021 September thla chung ah SAC ralkap pawl nih Thantlang khuapi cu khangh hram an rak thawk i tualchung mi hna cu a himnak hmun kawl in hmunkip ah ral an zaam hna. CRD: THE CHIN POST
Leave a Reply