KIA hruai mi hriamtlai bu hna nih Kachin ramkulh chung ah a um mi SAC ralkap sakhaan pawl an dohnak thla 2 a si cang i, cu caan chung ah cun sakhaan 70 hrawng an laak khawh cang, tiah theih a si.
KIO/KIA Headquarter a umnak Laiza khua kiangkap le Myitkyina-Bamaw lamthluan cung ah a um mi SAC ralkap sakhaan pawl cu March 7 thawk in KIA hruaimi hriamtlai bu hna nih doh hram an rak thawk.
Atu ah cun thla 2 a rau cang i hi caan chung ah hin SAC ralkap sakhaan a fa mi pawl le a ngan mi pawl fonh in sakhaan 70 hrawng kan laak cang, tiah KIO/KIA chimnak nawlngei Colonel Naw Bu nih a chim.
KIA nih Laiza kiangkap sakhaan ngangan tel in Moemauk-Lwejel karlak sakhaan ngangan 13 a laak pin ah abiapi ngaingai mi Tuluk-Myanmar ramri Lwejel khua zong a laak khawh.
Atu zong ah KIA nih pehzul in SAC ralkap sakhaan pawl a doh cuahmah. Myitkyina pawng Sinbu khua i SAC ralkap sakhaan (Kha La Ya 141) zong laak ding in KIA nih a doh cuahmah lio a si. crd: the hakha post
Leave a Reply