Ralhrang Kut In Kan Chin Mi 4 An Nun Nak A Liam 15 Hliam An Tuar Ee

Chinram, Mindat peng, Vawmthu khua sii-inn ah SAC ralkap nih vanlawng in bomb an thlak ruang ah tualchung 4 nunnak a liam i minung 10 hrawng hliam an tuar.  Sii-inn zong a rawk ngai, tiah CDF-Mindat in ṭuanvo ngei pakhat nih a chim.

Nizan April 25, zan suimilam 8:00 hrawng ah Mindat peng, Vawmthu khuakomh chung Vawmthu sii-inn cu SAC ralkap nih Jet Fighter nih bomb an thlak i siizung chung ah aa thlop lio mi mizaw 4 nunnak a liam pinah a dang minung 10 hrawng hliam an tuar, tiah theih a si.

“Sii-inn ah a um mi mizaw 4 an thi i minung 10 hrawng hliam an tuar, sii-inn cu a rawk dih ngawt ko, nizan cu chun nitlak zan khuadei ti tluk in kahdohnak an tuah, Mindat peng chung ah kaphnih kar kahdohnak a um bak lo,” tiah CDF-Mindat in ṭuanvo ngei pakhat nih cun a chim.

Vawmthu khua sii-inn lawng si lo in tualchung mi an umnak hmun pawl zong ah kahdohnak an tuah i a rawk mi kong le inn a rawk mi zat fiang in hngalh a si rih lo.

Cu bantuk ṭhiamṭhiam in nizan April 25, zanlei suimilam 4:30 hrawng ah Mindat peng Station 2 chung ah SAC ralkap nih Jet Fighter in voi hnih, Y12 vanlawng in voi 5 tiin, voikhat bomb thlak ah lung 10 hrawng a thlak, tiah theih a si. crd: the chin post

Mindat peng, Vomthu khuate ah a um mi sii-inn cu April 25 zaan sml. 8:00 ah SAC nih vanlawng in bomb a thlak caah minung 4 an thi i 15 hma an pu tiah theih a si.

A thi mi hna cu sii-inn ah aa thlop lio mi hna le mizaw congtu an si. Vanlawng bomb thlak ruang ah sii-inn le sii-inn quarter pawl zong an kaang, an rawkral dih tiah tualchung mi sin in kan theih.

“A thi mi pali an si. Pahnih hi bomb a thlak lio ah an thi i a dang pahnih cu an thi a chuah tuk caah a hnu deuh ah an thi tiah kan theih. Sii-inn le quarter cu remh awk tha lo in an rawk dih cikcek,” tiah tualchung mi pakhat nih a chim.

Vomthu khua cu Mindat khua in Chaklei meng 20 leng a hlatnak hmun ah a um mi a si i, Vomthu Sii-inn cu Mindat peng lawng si lo in Kanpetlet peng, Matupi peng, Magwe ramthen, Pakokko peng, Gangaw peng Yaw hmunram mizapi tiang nih an fuhpanh mi sii-inn a si tiah kan theih.